ARANDUPYKUAATY YMA: UMI IÑE'ẼNGATÚVA
UMI IÑE’ẼNGATÚVA
Ojekuaa niko iñe’ẽngatúvape kuaarekaha
ikatupyrýva ñe’ẽkuaambo’épe, oĩva’ekue ymave Grecia-pe. Ko’ẽreíre oje’e hesekuéra hi’arandúha
oikuaa rupi hikuái hetamba’e ohekombo’e porã hag̃ua yvypórape. Upéicha oje’évo,
avei ha’ekuéra omoarandu ha ohekombo’e motenondeharakuérape ikatuhag̃uáicha ipu’aka
tavaygua rehe.
Atenas-pe
oĩva’ekue jekupytyjoja, umi tavaygua oñemono’õ hikuái okaguasúpe ha upépe
oñe’ẽmbohovái hetamba’e oikóva tetãryepýpe; upéicha rupi ñe’ẽkuaa ha ñangareko pe
apytu’ũrokyre ndaikatúi oñemboykévo ha iñe’ẽngatuvakuéra omombarete umi mba’e
ha omoñepyrũ pirapire pyhy oporohekombo’e haguére.
SÓCRATES
he’i: Pirapire pyhy naiporãiha ojejapo jehekombo’e rehe, ikatu oñembyai,
ndorekóigui tekosãso, oñapytĩgui chupe ohepyme’ẽva hembiapóre.
PROTÁGORAS:
Niko peteĩ
kuaarekaha ha iñe’ẽngatúva, umi tuichavéva apytépe, omyakãva’ekue iñe’ẽngatúvape;
naikane’õivoi ha oguata oparupiete, ha iñe’ẽngatúva hekoitépe, ndojaporeíri ñe’ẽkuaambo’e.
Iñirũ Pericles,
kuaihára, ome’ẽ chupe ohai hag̃ua Léi guasu
Tekohaguasu pyahu Turios-pegua,
oñepyrũ jave jehekombo’e, tetãmba’éva, ojehepyme’ẽ’ỹre mba’eve ha katuete ojapova’erã
opavavete.
Protágoras
omombe’u iñapytu’ũroky kóicha: "Yvypóra ningo ojoja
opaite mba’e rehe", he’iséva ndaiporihavoi peteĩ temiandu añeteguaitéva
ñamohenda hag̃ua añetegua ha japúva; iporãva ha ivaíva.
Oĩ po mba’e iporãva ñaikumby hekopete
1 - Tekoporã ha Tetãsãmbyhykuaa Nahiañetekatúi: Protágoras ohecha pe ojeikohápe oñeimo’ãva
oĩ porã, ikatu ambue hendápe oĩ vai; ao’ỹre ningo Ikatu ojecha porã peteĩ
hendápe, ha ambue hendápe ikatu oĩ vai ha oje’uka ndéve tejuruguái térã
ndejukaitevoi.
Léi- kuéra ñepyrũrã noĩrivoi yvy
ape rehe, ha ñande heta hendáicha ikatu jajuhu pe iporãva ha avei tekojoja.
2 - Añeterõguáicha: Léi-kuéra niko ñe’ẽpeteĩ oñemoĩva ha osẽva’ekue peteĩ jekupyty tekoveatyguágui térã Katu omoĩva’ekue mbaretépe umi poguasukuéra; upévare ndaha’éi opa’ỹva, ha oĩ opaite hendápe yvy ape rehe; opyta’ỹva ha ojoavýva mayma aty rembiapógui.
3 - Tembiapo rupive: Ndoroviái ha’ekuéra
yvypóra rembiapo ikatuha iporã térã ivai añetehápe, térã ma’erãpa oiko ha
ndoikói, jajuhu haguã ñande jaipotahaichaite. Tembiecharã: japu ñepyrũra
naiporãi, ha ndoikóiramo jahupyty hag̃ua iporãva, iñe’ẽngatuvakuéra ogueroviáta
iporãha jajapo.
4 - Na’imba’egueroviáiva: Oreko py’amokõi
oĩha añeteguaiténte ha pe ñande jaikuaaháicha umi oĩva guive.
5 - Kuaapavẽ’ỹrape: Protágoras he’i: Tupã rehe che ndaikatúi
ha’e oĩpa térã nahániri, ndaikuaáiningo
mba’épa oreko hyepýpe ha heta mba’e nahesakãporãi chéve hesekuéra ha upevare peteĩ araverápe opa jeýma
ñande rekove.
GORGIAS:
ñe’ẽkuaa omoñypyrũ ypyva’ekue ikatuhag̃uáicha oñeñe’ẽ porã.
Ogueroviauka teko añete ikatuha
oñembohovái ñembojarúpe ha ñembojaru ikatuha oñembohovái teko añetépe; upeicha rupi hasyeterei umi
iñarandúvape oikumby porã hag̃ua iñe’ẽngatúvapa he’i añetegua térã gua’únte.
GORGIAS
he’i: Ñe’ẽ ikatu hasy, ikatu ome’ẽ vy’a; avei ikatu nemongyhyje, ikatu
rehenduseveseve ha nembopy’aguasu; ikatu nembohy’áipiriri ro’ỹsãmbambaite ku
paje oikerõguáicha nde pypy ha ombyai ne ãnga.
Gorgias
oguereko mbohapy hechaukapyrã:
1) Ndaipóri mba’eve
2) Oĩramo peteĩ mba’e, ndaikatúi jaikuaa
3) Jaikuaáramo jepe, ndaikatu mo’ãi
jaikuaaka opavavépe; mavave ndoikuaái ñane apytu’ũ ojoajuha arapy teére.
- Mba’éicha piko ikatu jaikuaa ñane apytu’ũme
oguahẽva añeteguaha.
- Jaikuaáramo jepe michĩmi, hasyta ñamombe’u
porã hag̃ua, ajeve pe ñe’ẽ joaju ha oĩva guive ha’e peteĩ joavy.
Comentarios