Yvypóra omano

Yvypóra omano

Yvypóra niko omano ha opytaparei opa mba’e. 

Umi ojejapotava’ekue tenondeve, tembiapo ogapýpe, nde debeha banco-pe, kokue, jeguakaita,  mba’yru pyahu ojejoguava’ekue ojehechauka hag̃ua. 

Yvypóra omano oñongatu’ỹre tembi’u moho’ysãhápe, opa mba’e itujupa, ao opyta osãingo térã opyta ojehejahaguépe. 

Yvypóra omano, ha isarambipa ñemomba’eguasu oñeimo’ãva’ekue ojeguereko, tekove ohorei hese mba’eve’ỹrõguáicha, ambue yvypóra oropu’aka ne pore’ỹ. 

Yvypóra omano ha opa mba’e oñeimo’ãva’ekue oporojopy opa ha opaite, umi ñandejopýva ñande ryepýpente oĩ, umi mba’e okakuaa ojejesarekoitereíramo hesénte ha omba’apo ñande rehe ojehejaháichante. 

Yvypóra omano ha yvóra sarambi sorokue ñande ñeime térã pore’ỹ ombojoavytarõguáicha,nahanirietékatu , ñandechavi ha ÑAÑEMOĨSÉKO, jaiko yvórare ha ñanderesarái oimeraẽte aravo ñamanotaha. 

Yvypóra omano, ha péva peichanteva’erãvoi, peteĩ tesapirĩme ndekyra neresãiguasu ha ambuépe remanómakatu.

Ne rymbajagua nderechaga’u opytávo, ko’ẽrõntema ambue omokunu'ũ. 

Hembireko térã imenamanóva omendapajey, oiko ojopóre, ovy’a oñondive ha hesaráima ndehegui. 

Yvypóra omano ha pya’evoi ñañemyengovia, ñane mba’apohápe, umi mba’e nadaiporuiva’ekue oñeme’ẽmba, oñemombo ytýpe, 

Jaharõ’ỹre yvypóra omano, ambue gotyo, avápiko oguapy oha’arõ iñemano, yvypóra oha’arõmba’érõ iñemano katuete oiporúta ijao iporãvéva, oñemohyakuãporãvéta, ohóta oikuaa tenda ambue, ikatúmba’e ho’uraẽ tembi’u arigua okaru mboyve, ikatu oñeha’arõsa’ive ambue tapichágui, yvypóra oha’arõmba’érõ iñemano, katuete oporoñyrõvéta , opukavéta, omomba’eguasuvéta hekoha, omomba’eguasuvéne hi’ára ha sa’ive viru. Yvypóra oikuaa ha oñandúrire oimeraẽ javete ikatuha oho ko yvy ape árigui , oikũmbýne vyroreiha jevy’a’ỹ oimeraẽ mba’ére, ohenduvéne purahéi ha ojerokýne ndojerokykuaáiramojepe, ára ohasapya’e, ojeju’ypy guive ojeguata puku ha pya’e opa peve tekove, ha upeichavérõ oĩ ipy’arag̃éva, opyta’ỹre oñandu ára ha ára ohasáva sa’iveha, yvypóra omanógui ára ha ára sa’isa’ípe ha sa’ieteve aravo’ive ohasáva ñambohovái ñandejupe ko mba’eporandu: Mba’épa ajapo ára hembývagui chéve, jajepy’amongetamína.

Ohaimbohasa: Karai Duarte