Veloriohágui rojúrõguare

 

Veloriohágui rojúrõguare

Peteĩ ka’aruete che sy he’i oréve roñembosako’i hag̃ua rohótagui upe pyharépe peteĩ omanovahápe, Ña Tóna ména kuri omano ha’éva karai Poli; roñemondyijoa ore, marõvénte ndorohóigui pe aipo omanovahápe.

Amo ipahápe roñembosako’i joa ha rohopaitevoi, che sy, ha che kyvykuéra, pokõi joyke’y niko roime po kuimba’e ha mokõi kuña. Rog̃uahẽma velorio-hápe, ha katu ojahe’óva mante heta oĩ, chembopy’apererepa ha che kyvykuéra iñakãhatãjoa, ndoúi ha ndohói chupekuéra ñemano, oiméneko che aikũmbymivéguima heta mba’e ajeve oguapyete cherehe karai ñemano, pakõi arýmako avei aguereko.

Pyharepytéma ohóvo ha che ndavy’avéima ha ha’e che sýpe rojere  jeýma hag̃ua orerópe. Upéi oñe’ẽñe’ẽ rire hapicha kuñakaraikuéra ndive, roje’ói sapy’a; ymáko ore nda’orerapeivoi ha kysepukúpe mante roipe’ape’a orerenonderã ka’aguyháre térã ñanandyháre, ha upéicha rojuroína jasyrendýpe, Mbeguekatúpe roñemoaĝui ka’aguy guasúgui ha Livo peteĩ che kyvy ogueru pe mba’e ohesapéva ipópe, ha oñemoĩ ore mbytépe, ore renonderãite ou che sy, kysepuku ipópe, upéi Hose, Kera, Livo mbytépe, Ana, Seku, Kili, che kyvy ipahaguéva ha ipahaitépe che.

Seku ipahaguégui, che añangarekove hese ha rojuroína, ha’e, roikévo tapepo’íre ahechakuaa sapy’a Seku ha che oretapykueha pe aty’ígui, ha ha’e chupe.

-¡Jahápy!, mba’étiko nembegueterei.

Amyañamo’ã ha ndahupytýi, aha’ã jey amyaña hag̃uáicha ha ndahupytyijey, upépe che reteko’õma ha akirirĩeténte sapy’aite, ha upéi asapukái che renonderãguápe.

-¡Pehesapemína oréve ore renonderã!. Pya’etereíma ningo peho.

Ha ojere Noni ohesape ore rehe, upepete mitãmi ouvakue che renonderã, aimo’ãva’ekue Seku oparei ha opaite. Upémaramo aporandu chupekuéra

-Seku piko oĩ penendive. 

-¡Oĩ!, ombohovaijoa chéve hikuái.

-¡Chaménto!, he’i chesy, pya’evéna reju, aje’ietereíma niko rejusehague ha ko’ag̃a reñembotapykue. Meméme ko añani hapykuerikuéra.

Rog̃uahẽ sapy’a ore rópe, ha upéi ko’ẽ rire ambue ára amombe’u che sýpe rokay’uhápe ojehu’akue chéve, ha aimo’ã’ỹre he’imi chéve ha’e ohechahague voi oúva chendive upe jave.

Ha upépe opa.

Che sy remimombe’u

Ohai: Diego Duarte